Ministry of Health and family Welfare-in nimina report a tihchhuahah hri kai hmuh chhuah thar mi 78,357 an awm leh a, nimin thleng hian India ramah hri kai 37,69,523 an awm tawh a ni.
Hri kai nasa taka an pun reng lai hian enkawl dam pawh an tam tawh hle a, MoHFW chuan darkar 24 chhungin hri kai enkawl dam mi 62,126 an awm leh tih tarlangin hei nen hian hri kai enkawl dam mi 29,01,908 an awm tawh. Darkar 24 chhungin mi 1,045 an thih leh avangin hri vanga thi mi 66,333 an tling tawh a, hri kai mek mi 8,01,282 an la awm bawk niin sorkar thuchhuah chuan a tarlang.
Enkawl dam rate hi 76.98% a ni tawh a, thihpui rate chu 1.76%-ah a tlahniam tawh a ni. Enkawl dam tawh hi hri kai mek aiin a let 3.6-in an tam tawh zawk a, sorkar thuchhuahin a tarlan aṭanga a lan dan chuan July chawlhkar hmasa ber nena khaikhin chuan August kar tawpah chuan enkawl dam hi a let liin an tam tawh zawk a ni.
Sample nuai 10chuang endik leh
Indian Council of Medical research (ICMR) chuan Thawhlehni khan sample 10,12,367 test a ni tih tarlangin nimina report an tihchhuah thleng hian sample 4,43,37,201 an endik tawh.
ICMR hian nitinin sample endikna tura pawmpui laboratory ramchhun hmun hrang hrangah a neih belh reng a, nimina an report tihchhuah thleng kha chuan laboratory 1614 pawmpui tawhin heng zinga 1019 hi sorkar laboratory a ni a, 595 chu private laboratory a ni thung.
Goa CM-in Covid-19 a kai
Goa chief minister Pramod Sawant chuan nimin khan Covid-19 a kai tih a sawi.
Sawant chuan a taksa lama harsatna a neih loh thu leh, in lamah a inkhung hran thu a sawi. In aṭanga hna a thawh chhunzawm tur thu sawiin, tunhnaia amah nen inhnaihna lo neite chu fimkhur turin a chah zui bawk.
Maha-ah hri kainuai 8 chuang tawh
India rama hri kai tamna ber (State/UT) Maharashtra-ah chuan hri kai hmuh chhuah thar mi 15,765 awm lehin Maharashtra-ah hian nimina sorkar report tihchhuah thlengin hri kai hmuh chhuah mi 8,08,306 an awm tawh.
Hri kai tawh zinga mi 5,84,537 chu an dam leh tawh a, 24,903 chu thi tawhin mi 1,98,866 chuan hri an la kai mek a ni.
Andhra Pradesh-ah chuan hri kai mi 4,45,139 an awm tawh a, heng zinga 1,01,210 hian hri an la kai mek. Tamil Nadu-ah pawh hri kai hmuh chhuah mi 4,33,969 an awm tawh a, heng zinga mi 52,379 chuan hri an la kai mek bawk.
