Nikum chhungin nitin intihlum 381 an awm

National Crime Records Bureau (NCRB) tarlan danin nikum, 2019 khan India ramah nitin intihlum mi 381 an awm ziah a, nikum chhung ram puma intihlum awm zat chu 1,39,123 an tling. 

Kum 2018 (intihlum 1,34,516) leh 2017 (intihlum 1,29,887) nena khaikhinin, nikuma intihlum zat  (1,39,123) punna hi 3.4% a ni. 

Khawpuia intihlum zat rate hi 13.9% a ni a, ram pum anga chhut chuan intihlum rate hi 10.4% a ni. Intihlum zingah hian inawkhlum an tam ber a, inti hlum zinga 53.6% a tling a, tur in vanga thi hi 25.8% niin, tuia zuangthlaa intihlum 5.2% leh mahni inhalhlum zat hi 3.8% a ni. 

Intihlum zinga 32.4% chu chhungkuaa harsatna tawh vang nia chhut a ni a, inneih kaihhnawiha buaina vanga intihlum hi 5.5% niin, natna neih avanga intihlum 17.1%  an awm. 

Nikuma ram puma mahni intihlum zingah hian 70.2% chu mipa an ni a, hmeichia 29.8% an ni. NCRB data hi police record behchhana siam a ni.