Rahul-a'n PM Modi leh a kaihhruai sorkar sawisel

Congress president aṭanga bang ta Rahul Gandhi chuan nimin khan tun hnaia India GDP tlakhniam vangin prime minister Narendra Modi leh a kaihhruai sorkar a sawisel.

Rahul chuan a twitter-ah hemi chungchang hi sawiin, Thawhṭannia National Statistical Office (NSO)-in data a tihchhuahah kum 2020-21 financial year kal lai, 1st quarter (April-June)-a GDP tlakhniamna chu 23.9% a nih thu tarlan a ni a, hei hi India history-a GDP la tlakhniam nasat ber a nih thu a sawi.

Modi kaihhruai sorkar hnuaiah hna hmu lo (unemploy­ment) an tam thu Rahul chuan a tarlang bawk a, kum 45 chhungin hna hmu lo an tam ber ṭum a nih thu a sawi. Hengte bakah hian hna chan mi vaibelchhe 12 chuang an awm bawk tih a sawi a, hetih lai mei hian sorkar laipui chuan GST pek chhuah tur chu state hnena a pek theih loh thu a tarlang bawk. Rahul chuan Modi kaihhruai sorkar chuan India ram economy a tichhe hle tih a sawi.

Nimin vek khan finance minister hlui leh Congress hruai­tu, P Chidambaram chuan India ram economy tlak chhiatna thleng mekah hian pathian mawhpuh tur a nih loh thu sawiin, mihring siam a nih thu a sawi. 

P Chidambaram chuan Covid-19 hri leng mek hi khua­rel chhiatna thleng a nih thu a sawi a, mahse ram economy tlakhniam zelna chhan pakhatah sorkar a tel a ni, a ti.