India ramah hri leng avangin hun rei tak ram pumah inkharkhipna kalpui a ni tawh a, mahse hri kai hi an lan pun belh zel. Khawvela hri kai tamna ram 10 zingah a tel tawh a ni.
Pathianni kha India ramah ni khata Covid-19 kai thar tam ber ni a ni leh a, darkar 24 chhungin hri kai thar mi 5,242 an awm.
Ministry of health and family welfare-in a tarlan danin nimin thleng khan India rama Covid-19 kai hi mi 96,169 an awm tawh a, heng zinga mi 3,029 chuan he hri hi an thihpui tawh a ni.
Hri kai enkawl dam tawh hi mi 36,824 an awm tawh a, hri kai enkawl dam tawh recovery rate hi 38.29% a ni.
Maharashtra chu India ram state zinga hri kai tamna ber a la chhunzawm zel a, Gujarat leh Tamil Nadu chuan an la dawt zel bawk. UT zingah chuan Delhi chu hri kai tam berna niin, hri kai hi mi 10,054 an awm a, heng zinga mi 4,485-te chu enkawl dam an ni tawh a, thi hi mi 160 an tling tawh bawk.
Kuwait aṭanga haw zingahhri kai 24 awm
Pathiannia hri kai hmuh belh zingah hian Kuwait aṭanga hruai haw zinga mi 24 an tel.
May 13 khan Kuwait aṭangin mi 134-te chu Madhya Pradesh-ah hruai thlen an ni a, Bhopal-a Indian Army EME centre-ah khung hran nghal an ni. Mahse test neih sak an nih hnuah an zinga 24 chuan hri hi an kai tih hriat a ni a, Chirayu Medical College Hospital-ah dah luh nghal an ni. Heng hawte lo buaipuitu, Central Industrial Security Force (CISF) mite pawh inah inkhunghran tir nghal an ni bawk.
Karnataka-in state pali aṭang luh khap
Karnataka sorkar chuan nimin khan hriattirna tichhuakin, India rama hri kai tamna state pali - Maharashtra, Tamil Nadu, Kerala leh Gujarat aṭangin May 31 thleng an state-ah luh khap a nih thu a sawi. Pathianni apiangin an state-ah kharkhipna pumhlum, 'total lockdown' kalpui a ni zel dawn tih deputy chief minister Aswhath Narayan chuan a sawi bawk.
