State-ten MHA khuahkhirhna siam thlahdul thei lo

Sorkar laipui chuan tun thla chhung atan lockdown a pawtsei leh a, mahse lockdown 4.0 hnuaiah hian khuahkhirhna tam zawk erawh thlahdul a ni. 

Lockdown pawhsei a nih thu puan a nih hnuah union home secretary Ajay Bhalla chuan state leh union territory-a chief secretary-te hnenah lehkha thawnin, ministry of home affairs (MHA) in lockdown 4.0 chhung atana khuahkhirhna a siamte chu state leh UT-te chuan an thlahdul thei lo tih a sawi. 

Bhalla chuan state leh UT-te chuan MHA-in thlahdulna a siam ṭhenkhat chu a ṭul a tih chuan an khap thei tih a sawi a, mahse khapna a siamte erawh chuan  a ti danglam thei lo ang, a ti. 

Kaihhruaina thar siamah hian state/ UT te chu health ministry-in tehna a siam hmangin an state chhungah Red, Green leh Orange zone-te an siam thei dawn a ni. Zone hi district emaw, municipal corporation emaw, chu aia huam zim zawk sub-division huam chinah emaw chauh pawh thliar theih a ni ang.