Ram chhunga hri leng dona kawnga hmatawng, healthcare worker-te chuan beih an tawh fo avangin union cabinet chuan hnathawkte venhimnna tur dan, Epidemic Diseases (Amendment) Ordinance 2020 a siam.
Information and broadcasting minister Prakash Javadekar chuan Nilainia prime minister Narendra Modi kaihhruaia union cabinet meeting-ah healthcare worker-te venhimna tur dan hi siam a ni tih sawiin, kum 123 zet lo hman tawh Epidemic Diseases Act chu siamṭhat a ni, a ti.
Doctor leh medical staff-te bei a, kut lo thlak ṭhinte chu ngaihzam mai mai an ni dawn lo tih a sawi.
Minister chuan healthcare worker beihna chu bail theih loh pawikhawihna a ni tiin, pawikhawihna thleng chu inspector rank officer-in ni 30 chhungin a chhui fel nghal zel ang, a ti. Pawikhawihtute hi thla thum aṭanga kum nga thleng lungin tantir theih a ni a, Rs 50,000 - Rs nuai hnih thleng chawi tir theih an ni bawk.
Healthcare worker beih tawkten hliam na tak an tuar a nih chuan, pawi khawihtu chu thl aruk aṭanga kum sarih thleng tang tura hrem theih a ni a, Rs nuai 1- Rs nuai 5 chawitir theih a ni bawk ang.
Healthcare worker-te motor emaw, clinic emaw beih a nih chuan, pawikhawihtu chuan an thil tihchhiat man chu a hlutna let hnih a pek a ngai dawn a ni.
Javadekar chuan ram chhung hri leng mekah, health worker-te chuan hri laka kan him theihnaturin theihtawp an chhuah a, hetihlai hian hmun ṭhenkhata beih an lo tawk ṭhin hi thil pawi tak a ni. Hetianga beih an tawh ṭhin hi sorkar chuan a enliam mai mai dawn lo a ni, a ti.
Cabinet-in ordinance hi a siam hnuah president Ram Nath Kovind pawh pawmpuiin, Nilaini zan khan he dan hi hman nghal a ni.
