Odisha sorkarin Covid-19 vanga health worker thi Chhungte hnenah zángna-dawmna a pe dawn

Odisha chief minister Naveen Patnaik chuan nimin khan an state-a Covid-19 dona kawnga a hmatawngtu, health worker-te chu he hri vangin an thi a nih chuan an chhungte hnenah zángnadawmna, Rs nuai 50 pek an nih tur thu a sawi.

Sorkar leh private damdawi-ina hnathawk leh he hri donaa thawk, sorkar hnathawkte chu hri vanga thi an awm chuan an chhungte hnenah  zángnadawmna pek an nih bakah, ram tana nunna hlan 'martar' dinhmun pek tur an ni a,state chawimawina nen vui liam an ni ang, tiin Patnaik chuan a sawi bawk. Health worker-te hi hri vanga an thi a nih chuan an chhungten an pension hma chu an hlawh pangngai angin an la zel bawk dawn tih Patnaik chuan video kaltlangin a sawi a ni. 

Health worker-te hmun ṭhenkhata beih an tawk ṭhin chu Patnaik hian pawi a tih thu sawiin, lo bei tawh lo turin mipuite chu a chah a, an chungah National Security Act hmanga state sorkarin action a lak theih thu a sawi. Health worker lo bei­tute chu state beitute an ni tiin Patnaik chuan a sawi.

Odisha-ah hian Covid-19 vanga health worker thi an la awm lo a, state chhunga hri kai zat hi mi 83 an awm tawh a, chung zinga mi 32-te chu enkawl dam tawh niin, mi pakhatin a thihpui tawh a ni.