May thla laihawlah Covid-19 vangin mi 38,220 thih ring

India-a institution palite zirchiannaah chuan May thla laihawl hian Covid-19 vangin India-ah mi 38,220 an thih hman rin a ni.

Heng institution palite hi Jawaharlal Nehru Centre for Advanced Scientific Research (JNCASR), Indian Institute of Science-Bangalore, IIT-Bombay leh Armed Forces Medical College-Pune-te an ni a, Italy leh New York dinhmun an zirchianna aṭanga India dinhmun tur hi sawi lawk an ni. He pawl kaihruai tur hian Principal Scientific Advisor (PSA) K Vijayaraghavan chu hotua dah a ni.

Kar khat chhungin (April 28 thleng) mi 1,012 vel an thih hman an ring a, a kar leh (May 5 thleng) hian mi 3,258, a kar thumna (May 12 thleng) ah mi 10,924 leh a kar lina (May 19 thleng) hian mi 38,220 an thih hman an rin thu heng institution intelkhawm  hian a zirchianna aṭangin a tarlang a ni.

JNCASR Associate Pro­fessor Santosh Ansumali chuan "Kan rin ang chiah chiah hi a dik kher lo maithei a, mahse zirchianna aṭanga a landan hi chuan India rama damdawi-ina ICU-ah hian khum 76,000 chuang mamawh belh a ni," a ti. Khum bakah hian damdawi lam  hmanruate pawh mamawh belh a nih tur thu Ansumali chuan a sawi bawk.

Ansumali chuan May 3-a sorkar laipuiin lockdown a sut a nih chuan thi hi an sawi anga a dik chhoh a rin thu a sawi a, lockdown puan belh a nih erawh chuan thi an tlem phah theih thu a sawi bawk.