Testing kit tam zawk buatsaih turin ngen
Congress party interim chief, Sonia Gandhi chuan coronavirus chu kar thum kal ta chhung khan ram chhungah chak takin a darh a ni tiin, hri darh zel tur venna atana pawimawh chu a tam thei ang ber test a nih avangin testing kit tam zawk buatsaih turin sorkar laipui a ngen.
Nimin khan Sonia Gandhi hian video conference hmanga Congress Working Committee (CWC) meet neihah thu a sawi a ni.
Gandhi chuan, " Prime minister hnenah hian test, trace leh quarantine thlaktu dang a awm chuang lo tih hi kan sawi nawn leh duh a ni. Mahse ram chhunga test zat hi a la hniam hle a, testing kit supply pawh a tam tawk lo a, a quality a chhe hle tih pawh kan hre leh zel a ni. PPE kit pawh a tlemin a quality a chhe hle bawk,' a ti. Covid-19 dona atana sorkar thurawn a pekte pawh sorkar chuan a ṭhen a zar chauh a kalpui niin a sawi.