Parliament budget session, January 31 aṭanga neih ṭan chu nimin khan a zo ta.
Kumin April-May vel hian Lok Sabha inthlanpui neih a nih dawn avangin ṭun ṭum session hi BJP kaihhruai NDA sorkar hnuaia Parliament session hnuhnung ber a ni.
Nimina Rajya Sabha inkhawmah hian ngaihven hlawh tak, Citizenship Amendment Bill, 2016 chu pharh hman a ni ta lo. Eptuten Rafale deal chungchanga Comptroller and Auditor General report sawisel a, lungawi lohna lantira an aubuai avangin ro rel thei loin session hi tiam chin awm loa tihtawp a ni. Hei vang hian Lok Sabha-a pass tawh, CAB leh Triple Talaq bill te chu Rajya Sabha-ah pharh a ni ta lo a, sorkar lai hnuaia session tawpna ber a nih tawh avangin heng bill pahnihte hi a tawp, lapse anga ngaih a ni. Sorkar thar hnuaia Lok Sabha term tharah bill hi a bul aṭanga ngaihtuah ṭhat leh a ngai dawn a ni.
Ram pathum Afghanistan, Pakistan leh Afghanistan aṭanga December 31, 2014 hma lama India rama pem lut, Muslim ni lote hnena India khua leh tui nihna pek theihna tur, Citizenship Amendment Bill, 2016 hi January 8 khan Lok Sabha-ah pass a ni tawh. Thawhlehni khan Rajya Sabha-ah pharh tum a ni a, mahse Samajwadi Party-ten an party hotu Akhilesh Yadav chunga thil thleng duh lohna lantira rorel inkhawm an auhbuai avangin pharh hman loin inkhawm tihtawp a ni. Nimina rorel inkhawmah CAB hi pharh leh tura tih ni mah se, Rafale deal chungchanga CAG report avanga eptu lamte an aubuai leh avangin inkhawm hi tihtawp lailawk a ni.
Rajya Sabha inkhawm chhunzawm a nih leh hnuah member-te aubuaina karah debate pawh nei tawh loin Budget session ṭanni-a President Ram Nath Kovind-a thusawi chungchangah Motion of Thanks pass a ni a, Interim Budget leh Finance Bill te pawh sawiho loin pass zui a ni. Voice vote hmang hian The Personal laws amendment bill 2018 pass a ni bawk . Hemi hnu, chhun dar 12.48-ah Rajya Sabha rorel inkhawm chu tiam chin awm loa tihtawp a ni ta a ni.
CAB hi eptu party te bakah hmarchhak state hrang hrangah nasa taka dodal a ni a, hmarchhak state-a political party, zirlai pawl leh NGO ten duh lohna lantirin nawrh an huaihawt fo a ni. He bill hi pass a nih chuan dan loa Bangladesh aṭanga Hindu pem lut mi tam tak te chu khua leh tui dik tak anga pawm an ni dawn a, ram leilung fate chu awlsam taka chimral an ni thei mai dawn niin an sawi a ni. BJP sorkarna, Arunachal Pradesh Chief Minister Khandu leh Manipur Chief Minister N Biren Singh te pawhin bill hi na takin an sawisel a ni. NDA hnuaia BJP thawhpui, Shiv Sena leh Janata Dal United chuan bill duh lo lamah an vote tur thu an sawi.
Lok Sabha-ah chuan ponzi scheme aṭanga investor-te venhimna tur, Banning of Unregulated Deposit Scheme Bill, 2018 chu nimin khan pass a ni. Bill pass hmaa sawihonaah, Finance Minister Piyush Goyal chuan bill-ah hian Standing Committee on Finance rawtna siamte dah a nih thu a sawi. Minister chuan ramchhunga deposit scheme dik lo kalpuina thubuai 978 zingah 326 zet chu West Bengal state bika thleng a nih thu a sawi. Sorkar chuan hetianga dik lo taka investor-te sum lakluhna thleng ṭhin titawp tur hian theihtawp a chhuah a ni, a ti. Bill hi voice vote hmanga pass a ni.
