SC-in Bihar dy CM hlui a bungalow chhuahsan turin ti

Supreme Court chuan Bihar Deputy Chief Minister hlui leh Rashtriya Janata Dal (RJD) party hruaitu Tejashwi Yadav chu a awmna bungalow chhuahsan tur leh, eptu hruaitu awmna tur bungalow a insawn turin a hriattir. 

Patna High Court chuan Yadav hi a bungalow chhuahsan tur hian hian a lo hriattir tawh a, hei hi Yadav chuan Supreme Court-ah khing let mah se, a khin letna hi a lo hnawlsak a ni. Chief Justice Ranjan Gogoi, Justice Deepek Gupta leh Sanjiv Khanna te awmna bench chuan RJD hruaitu hi High Court thupek a khinlet avang leh hemi chungchang ngaihtuahna atana an hun a khawhral tir avangin  Rs 50,000 chawi turin an ti bawk. 

Yadav hi deputy chief minister bungalow-ah a la cheng mek a, a bungalow hi Raj Bhavan leh chief minister official residence aṭanga hnaite a ni. He bungalow hi Nitish Kumar-a kaihhruai-a ṭangrual pawl, Grand Alliance ten sorkarna an siam laia deputy CM atana ruat Yadav-a tan hian dah a ni. Mahse ṭangrual sorkar hi ṭhiah a ni zui a, Kumar hian BJP thawhpuiin NDA sorkar an siam zui leh ta zawk a ni. RJD hi eptu lamah a awm tak avangin Bihar sorkar chuan a bungalow hi chhuahsan turin a lo hriattir tawh a ni.