West Bengal Chief Minister Mamata Banerjee-in an state-a Central Bureau of Investigation (CBI) official-te chet dana lungawi lo a, 'Save the Constitution' sit-in protest a huaihawt chu ni thum hnuah a titawp. 

Pathianni khan CBI officer-te chuan Kolkata police hotu Rajeev Kumar chu Ponzi scheme kaihhnawiha thu zawhfiah an tum a, mahse Kumar-a ina kal CBI official-te hi local police-te chuan Kumar-a thu an zawh theihna tur lehkha pawimawhte an nei em tiin an lo dang a, police station-ah hruaiin hren zui an ni a, mahse reilote hnuah chhuah leh nghal an ni. He thil thlen hnu hian CM Banerjee-i chuan BJP kaihhruai NDA sorkar duhdan anga thiltiah CBI chu puhin, CBI officer-te chetdan aṭang chuan ram danpui  leh democracy chu humhalh a ngai ta takzet niin a sawi. Pathianni vek khan Kolkata-ah nawrh hi a huaihawt zui nghal a ni. 

Thawhlehni khan Supreme Court chuan West Bengal sorkar leh CBI inkara inhriatthiam lohna awm chungchang hi ngaihtuahin, Kumar chu Shillong-ah CBI hmaah thu zawhfiah tura inlan turin a ti a, hemi rual hian CBI chu  investigation an zawhfel hma chuan Kolkata police hotu hi man lo turin a ti bawk. 

Supreme Court thutlukna tihchhuah a nih hnuah Banerjee pawh hian a nawrh huaihawt hi a titawp ve ta nghal a ni. Court thurel dan chu ṭha a tih thu sawiin, Trinamool Congress hotu chuan hemi chungchang hi an la sawizui leh tur thu a sawi. Prime Minister Narandra Modi leh a kaihhruai sorkar chu na taka beiin, sorkar laipui chuan central agency zawng zawng bakah state agency thlenga thunun a tum tih a sawi. PM Modi chu bang tura tiin Gujarat state-ah, mi pakhat sorkarna leh party pakhat sorkarna hmunah kir leh turin a ti a ni.