UP-ah sorkar hnathawk nuai 40 chuangin nawrh huaihawt
US President Donald Trump chuan kumtina US President-ten an lo tih ṭhin, State of the Union speech chu Thawhlehni khan US Congress joint session hmaah a sawi.
President Trump chuan dan loa an rama pemlutte chu thil ngaihtuah ngai tak a nih thu sawiin, Democrats lamin an lo hnawlsak tawh, Mexico ram hungna bang siam a ni ngei dawn tih a tiam nawn leh. Trump chuan, " A hma pawhin he room-a awm tam zawkte chuan ramri hungna siamna tur hian an lo vote tawh a, mahse tun thlengin bang ṭha tak siam a la ni lo a, keiman ka siam ngei dawn a ni", a ti.
Trump-an kum 2016 inthlan dawna a campaign auhlaa a lo hman, US-Mexico ramri hungna bang siamna tura dollar tluklehdingawn 5.7 pechhuak tura a ngenan chu Congress-ah Democrats lamin an pawmpui theih loh vangin US sorkar chu hnathawk mumal thei loin ni 35 zet khar (shutdown) a lo nih phah tawh a ni. Sorkar shutdown a nih vang hian State of the Union speech neih tur pawh hi kar khatin tihtlai a nih phah a, January 25 khan sorkar shutdown hi tihtawp a ni chauh a ni. Democrats lam chuan ramri hungna bang siamna tura sum tam tak sen hi sum khawhralna mai mai leh thil awmze nei lo niin an ngai.
President chuan thawhhona ṭha neih a duh thu sawiin, phuba lak tumna, indodalna leh inthungrulh tumna politics chu hnawl ngam a ni, a ti. Democrats lamin awn lam nei tak chunga a kaihhruai sorkar leh a hnathawhte an chhui ṭhin dan chuan an ram economy ṭhan dan tur thlengin a nghawng thei a ni, a ti.
Kum 72 mi, President Trump hian a thusawi tam zawkah foreign policy chungchang a sawi a, February 27-28 a North Korea hotu Kim Jong-un nena Vietnam rama summit an neih leh tur thu pawh a sawichhuak bawk. Hruaitu pahnihte hi nikum June thla khan Singapore-ah an lo inhmu tawh a ni.
Venezuela ramchhung politics buaina thleng mek pawh a dem thu sawiin, Trump chuan America chu socialist ram a ni ngai dawn lo tih a sawi. Hei hi Democrats
ṭhenkhat, socialist intite a kahletna kawng khat nia ngaih a ni.
Syria leh Afghanistan aṭanga US sipaite lakchhuahna tura thutlukna a siam pawh thil dik tak a nih thu a sawi nawn leh. America sipaite lakchhuah an ni tur hi eptu lam bakah Republican member eng emaw zatin an sawisel a ni.
Trump chuan, "Ram ropuite an indo reng ngai lo" tiin US chuan a thawhpuite nen Islamic State firfiak la awmte pawh nuaibo turin an bei chhunzawm reng a ni, a ti. Nikum December thlaa Trump-ah Syria aṭanga US sipaite lakchhuah an nih tur thu a puan hnuah, IS hian an ram luahte pawh an hloh tawh a, mahse military official-te chuan America sipaite an chhuah chuan thla ruk chhung vel lekin IS firfiakte hi an intelkhawm leh thei dawn niin an sawi.