Hazare-an chaw ngheia nawrh a titawp

Social activist Anna Hazare chuan central-a Lokpal leh state-a Lokayukta din phuta chaw ngheia nawrh a huaihawt chu Thawhlehni khan a titawp. 

Anna Hazare hian ni sarih chhung chaw ngheiin nawrh  hi a huaihawt hman a, mahse Maharashtra Chief Minister Devendra Fadnavis leh union minister pahnihten nawrh a huaihawtna hmun, an khua Ralegan Siddhi khuaa meeting an neih hnuah tihtawp a remti ta a ni. Inbiakna ṭha tak leh lungawi thlak tak an neih theih thu sawiin, hei vang hian nawrh tihtawp a tum ta niin Hazare chuan a sawi. 

Hazare hian January 30 aṭang khan Maharashtra-a an khuaah hian tiam chin awm loa chaw nghei hi a ṭan a ni. 

Thawhlehni tlai khan CM Fadnavis chuan Ralegan Shiddi khua hi panin Hazare nen hian rei tak an inkawm a, meeting zawh hnuah reporter-te a kawmnaah activist thil phutte chu tihhlawhtlin a nih tur thu a sawi a ni. Lokpal ruatna tur hi buaipui thuai a ni dawn tih a sawi. Fadnavis hi union minister Radha Mohan Singh leh Subhash Bhamre bakah Maharashtra minister Girish Mahajan ten an ṭawiawm a ni. 

Kum 81 mi, Hazare hian a nawrh huaihawt aṭanga ni nga chhungin kg 3.8 a hloh hman a, a blood pressure, blood sugar leh creatinine level pawh a sang hman niin a endiktu doctor chuan a sawi.