Congress senior leader Shashi Tharoor chuan kum 2019-a Lok Sabha inthlanpui neih hunah All India Congress Committee (AICC) president Rahul Gandhi chu prime minister candidate a ni lo maithei tih a sawi.

Kerala MP Tharoor chuan inthlanpui neih tura hian an party chuan party dangte an thawhpui ngei dawn a, mahse PM candidate chungchang chu lungrual takin an rel ho dawn tih a sawi. Congress kaihhruai ṭangual pawlten prime minister candidate atana an dah tur chu thawkho hrang hrangten lungrual taka an pawm tlan a ni dawn a, BJP ang lo takin anni chuan rilru zau tak an pu tih a sawi bawk.

Tharoor chuan mithiam leh hruaitu ni tlak tak tak an party chuan an nei nual tih sawiin, party hruaitu Pranab Mukherjee leh P Chidambaram te pawh an political career-a record nei ṭha tak tak an ni, a ti. Record nei ṭha dang tam tak an la nei tih a sawi.

Hemi rual hian Congress worker-te chuan hruaitu leh PM atan hian Rahul Gandhi chu an duh ber a ni tho tih a sawi a, inthlanpui neih tur hi dik leh felfai taka neih a nih chuan Rahul Gandhi kaihhruai Congress hian hnehna an chang ngei ang, a ti.

Prime Minister Narendra Modi pawh beiin, Modi chu one-man government niin a sawi a, amah tihlawm tumin mi zawng zawngin an bei a ni, a ti. India ram chuan PMO in a thuneihna a pumhmawmna nasat ber hun a tawng mek a ni, a ti. "Thutlukna zawng zawng chu PMO (prime minister's office) in a siam a, file zawng zawng pawh PMO pawmpui tura thawn ṭhin a ni", a ti.

Finance Minister hlui P Chidambaram pawhin thla hmasa khan Congress party chuan an president Rahul Gandhi chu prime minister a nih tur thu official-in an la sawi lo tih a sawi a, an thawhpui party dangte nen an la rel hawn dawn chauh a ni, a ti. Tuna Congress in tum ber chu BJP sorkar paihthlak a, ram hmasawnna ṭha thlentir a nih thu a sawi.