Kharge-an PM Modi leh German dictator Hitler-a tehkhin

Congress hruaitu Mallikarjun Kharge chuan Prime Minister Narendra Modi chu German dictator Hitler-a nen a tehkhin a, Modi chuan India democracy chu dictatorship-a leh a duh a ni, a ti.

Pathianni-a Mumbai Congress-in Bandra-a 'Samvidhaan Bachao Parishad' an buatsaihah thu a sawinaah he thu hi sawiin, Kharge chuan Modi chuan Hitler-an Germany ram chunga a thiltih ang khan Modi hian India ramah tih ve a duh a ni, tiin a sawi.

Karnataka Lok Sabha MP chuan BJP rorelna hnuaiah India ram dinhmun chu a chhe zel tih a sawi a, mahse Congress party chuan RSS, BJP leh PM Modi-ten institution an tihchhiat anga ram danpui tihchhiat an tum chu a phal dawn lo a ni, a ti.

"India ram Danpui hi hnam bil, sakhua leh pawl bil ta niloin India ram mipui ta a ni. BJP sorkar hian parliamentary democracy-ah hian eng right to freedom hi nge a zah ve?" tiin a zawt zui bawk.

"Kum li kalta chhung khan BJP chuan kawng dik pali pawh an zawh thei lo. Hei vang hian Congress party chu kuta kawk a, kum 70 kalta chhunga kan hnathawhte min zawt let turin dikna engmah an nei lo" tiin, Congress general secretary in charge of Maharashtra chuan a sawi. BJP in sorkar an chan aṭangin, press mite zalenna hrekbeh tumin freedom of speech and expression pawh a tichhe tawh a ni, a ti bawk.

Mumbai Congress hotu Sanjay Nirupam pawhin thu sawiin, India ram danpui chuan beih a tawk ta fo tih a sawi. "India ram innghahna lungphum Constitution chuan beih a tawk fo a ni. Kum li kalta aṭang khan BJP chuan ram dan leh dun nena inmil lo dan thar, an duhdan angin an duang a ni", a ti. Ram danpui venhim a ngai a, venhim a nih chauhin India ram chu a him dawn a, hemi atan hian mipuite pawh theihtawp chhuah zel turin Congress MP Hussain Dalwai chuan kalkhawmte a ngen bawk a ni.