J&K, HP leh Uttarakhand-ah vur surin inkalpawhna tibuai

Jammu and Kashmir, Himachal Pradesh leh Uttarakhand-ah Pathianni aṭanga vur a sur nasat avangin kawng eng emaw zat a dangchat a, traffic pawh a tibuai hle.

Kashmir Valley leh ramchhung hmun danga inkalpawhna chu vur sur hian a dang ping. Srinagar-ah pawh kum 2009 hnua a ṭum khatna atan November thlaah vur a sur a ni. Jammu-Srinagar national highway chu vur sur leh lemininin a hnawhpin hnuah nimin khan hawn a ni a, Jawahar tunnel area-a tangkhang mi 700 chuang chhanchhuah an ni bawk.

Kawng laka tangkhang chhanchhuahte hi Nowgam leh Gund biala sakhaw in hrang hrangahte riahtir an ni a, anni bakah civil mi 1,000 vel, highway danga tangkhangte pawh ei tur leh mutna turte pek an ni bawk niin police-te chuan an sawi. Senior Superintendent of Police (SSP), Ramban, Anita Sharma chuan Jawahar tunnel area aṭanga chhanchhuahte chu Pathianni khan Jammu lam panpui an ni tih a sawi.

Jammu and Kashmir Governor Satya Pal Malik chuan Pathianni khan vur surin harsatna a thlenna hmunte enin, kawngpui thenfai hna leh electric supply rang taka pe tura hma la turin thuneitute a hrilh. Malik chuan mipuite harsatna tawh mekte enfiah a, an mamawhte pek an nih dan turte ngaihtuah turin a ti bawk.

Uttarakhand-ah pawh vur sur hian kawngpui eng emaw zat a dangchat a, Himachal Pradesh-ah pawh Pathianni khan vur a sur nasa a, khaw vawh lam pawh 2.8 degree Celsius a ni tawh a ni.