Union Home Ministry chuan state sorkar tin hnenah an state chhunga Rohingya muslim pem lut zat chhiar a, biometric data la vek turin a ti a, Rohingya mi ṭhenkhat dan loa thiltihnaa inhnamhnawih an awm ṭhin thu report pawh sorkar laipui chuan a dawng niin a sawi.

Sorkar laipui chuan Rohingya-te chu refugee ni loin dan loa pem lut an nih thu a sawi bawk.

Lok Sabha-a Rohingya pem lut chungchanga zawhna a chhannah, Home Minister Rajnath Singh chuan state sorkar te chu Rohingya awmte chhiar tura thurawn pek an nih thu a sawi a, Border Security Force (BSF) leh Asam Rifle-te pawh dan loa pem luh tumte dang tura ṭan la tura tih an nih thu a sawi.

Minister of State for Home Kiren Rijiju pawhin dan kalha chetna thlengah Rohingya te an inrawlh thu report-te pawh an dawng tih a sawi a, mahse an chetdan kimchang erawh a sawilang lo. House-ah hian India ramah Rohingya 40,000 vel an awm thu sawiin, heng zinga a tam zawk Jammu and Kashmir, Hyderabad (Telangana), Mewat (Haryana) leh Tripura-ah an awm a ni, a ti.