UK Judge-in Vijay Mallya tantir tumna jail video pe turin ti

Bank hrang hranga loan tam tham tak bat vanga UK-a tlanchhia, Vijay Mallya chu Thawhlehni khan Westminster Magistrates' Court-ah a inlan.

UK thuneitute hnenah Vijay Mallya hi a thubuai hmachhawn tura India rama thawn kir tura ngen an lo ni tawh a ni. Thawhlehni khan Westminster Magistrates' Court judge Emma Arbuthnot chuan Mallya hi India rama thawnkir a nih a tan tir tumna, Mumbai-a Arthur Road Jail chhung awmdan video chu pe turin Indian official-te a ngen.

Judge chuan India thuneituten jail thlalak an thawn chu a duhtawk lo tih sawiin, video-a la zawk tura tiin kar thum chhunga thehlut turin a ti bawk a ni. Video lak dan tur pawh sawiin, chhun engah ngei la turin a ti a, jail chuan ni eng a hmu thei em tih pawh a langchian thei dawn a ni, a ti.

Kum 62 mi, Kingfisher Airlines hotu hlui, Mallya hi nikum April thlaa man a nih hnuah bail-a chhuah zui a ni. Bank hrang hrangah loan, cheng vaibelchhe 9,000 chuang a bat avangin inbumna hmang leh dik lo taka sum chheprelhah puh chungchangah thubuai eng emaw zat siamsak a ni.

Thawlhlehnia court-ah a inlan hian a fapa, Siddharth-an a kalpui a, Mallya chuan a buaina chu kum eng emaw zat aṭang khan chinfel tuma theihtawp a lo chhuah tawh thu a sawi.