Firfiak aiin bawng talh hi pawikhawihna lian zawk a ni: BJP MLA

Rajasthan-a BJP MLA Gyan Dev Ahuja chuan bawng talh chu firfiaka chetna aia pawikhawina lian zawk a ni tih sawiin, bawng talhtute chuan a nghawng let tuar tura an inpeih a ngai a ni, a ti.

Ahuja chuan bawng talh hian ramchhunga mi vaibelchhe tel rirlu a ti na tih sawiin, pawikhawihtute hian chhuanlam engmah an nei tur a ni lo, a ti. "Bawng talhtute hi firfiakte aia pawikhawihtu lian zawk an ni. Firfiakte chuan mi 2-3 te an that a ni mai a, mahse bawng talh a nih chuan Hindu mi vaibelchhe tel rilru a ti na a ni", a ti. Bawng talh hian mipuite thin a ti ur a, hei vang hian bawng talhtute hian hremna an tawrh ngei a ngai niin a sawi.

Hetih lai hian bawng humhalhtu intite chuan ramchhung hmun hrang hrangah bawng talha puh mi eng emaw zat an sawisa hlum tawh a, he thil hian Supreme Court beng pawh a thleng tawh a, sorkar laipui hnenah mipui thinrimten dan loa mi an sawisak rawn leh sawisak hlum thleng ṭhin venna tur dan te ngaihtuah turin a lo ti tawh a ni.

Hetih lai hian nikum September thlaa siam, BJP sorkarna state Madhya Pradesh-a India rama cow sanctuary hmasa berah chuan sum leh thawktu lam indaih loh vangin bawng an lakluh belh thei tawh lo. Cow sanctuary, Kamdhenu Gau Abhayaranya hi Agar-Malwa district-a siam niin nikum khan RSS hotu Mohan Bhagwat-an an hawng a ni. Sanctuary hi acre 1200 zet zau niin, cheng viabelchhe 32 senga siam a ni a, bawng 6,000 vel awm theihna tura ruahman a ni. Tunah hian bawng 4,000 vel enkawl mek an ni a, mahse an chaw man turte a hautak chhoh zel avangin bawng hi an lakluh belh thei tawh lo.

Sanctuary hotu Swami Akhileshwaranad Giri chuan an hmun enkawlna tur state sorkarah cheng vaibelchhe 56 a phut thu a sawi a, mahse budget-ah cheng vaibelchhe 25 vel chauh dah a ni, a ti. Budget ennawn tura an rawtna chu state finance ministry chuan a hnawlsak niin a sawi bawk. Sanctuary enkawlna tur sum hi state sorkarin a pek chhuah belh tawh thu sawiin, an sum mamawhte phuhru tura donor zawng turin a ti zawk tih a sawi.