Sorkar laipui chuan Cauvery lui tui sem dan tur chungchanga draft scheme a siam chu nimin khan Supreme Court-ah a thehlut ta.
Chhim lama state pali–Karnataka, Tamil Nadu, Kerala leh Puducherry ten Cauvery lui tui an inchuh chungchanga buaina chinfel dan ngaihtuah a, draft scheme siam tur hian sorkar laipui chu a lo hriattir tawh a ni. Chief Justice Dipak Misra kaihhruai Justice AM Khanwilkar leh D Y Chandrachud-te awmna bench chuan sorkarin draft scheme a thehluh hi enfiahin, May 16 hian an pawmsak tur thu a sawi. Hemi rual hian he scheme hi court thupek zulzuia siam a ni em tih an enfiah dawn tih a sawi bawk.
February 16 khan Supreme Court chuan hun rei tak Cauvery lui tui inchuh chungchanga buaina hi ngaihtuahin, Karnataka quota chu thousand million cubic feet (tmcft) 14.75-a tihpun sakin, lui tui hi 270 tmcft a pe a ni. Tamil Nadu chanpuial erawh tmcft 404.25-ah a titlem thung.
Surpeme Court chuan Cauvery lui tui inchuh buaina chinfel dan ngaihtuah tur hian sorkar laipui chu Cauvery Management Board (CMB) din turin a ti a, kar ruk hun a pe a ni. Mahse a hun pek hi March thla tawp khan a ral tawh a, hun pek chhung hian sorkar laipui chuan a din hman loh avangin hun pek belh turin a dil a ni.
Nimina sorkar laipuiin draft scheme a thehluh hi Cauvery lui tui latu state pali-te hnenah hian a copy pek vek a ni a, court chuan he scheme a pawm hma hian state pali-te hian draft scheme-a tarlan te chu dodalna an neih chuan a ngaihthlaksak phawt dawn a ni.
