Kathua case: Thubuai siamsak 3-te Supreme Court-ah zualko

Jammu and Kashmir-a Kathua district-a hmeichhe naupang pawngsual rawn leh thahnaa inhnamhnawiha puha thubuai siamsak zinga pathumte chu Supreme Court-ah zualkoin, police-te tihduhdah leh nghaisak an tawk nasa niin an sawi.

Thubuai siamsakte hian police-ten thu an zawhfiah laite chu video-a record vek an phut a, an thu thehluh hi May 16 hian court chuan a ngaihtuah dawn a ni.

Court hian a hmain thubuai nei zinga pahnihten an thubuai CBI ngaihtuah tir tura an phutna chu a lo hnawlsak tawh a, thubuai ngaihtuahna hi Jammu aṭangin Punjab-a Pathankot-ah a sawn tawh bawk. Hei hi pawngsual tawktu chhungten J&K pawn lama thubuai ngaihtuah tura an ngen vang a ni.

Court chuan pawngsual thubuai ngaihtuahnaa thuhretu koh leh thubuai siamsakte thu zawhfiahnaah camera dah turin a lo ti tawh bawk a, hei bakah hian thubuai ngaihtuah a nih dan chu ngun taka a thlithlai reng tur thu pawh a sawi bawk. Court chuan thuhretute bakah thubuai siamsakte pawh thubuai ngaihtuah a nih lai hian an himna ngaih pawimawh a nih thu a sawi a, dik tak leh felfai taka thubuai hi ngaihtuah a nih tur thu a sawi a ni.

Hetih lai hian pawngsual tawktu hmeichhe naupang ruang phumna atana a ram petu, Mohammad Rafiq chuan right-wing organisaton hotuin a vau thu a sawi niin PTI report chuan a tarlang. Rafiq hian police-ah complaint thehlutin, right-wing organisation hotu hian an awmna bial aṭanga um chhuahah a vau niin a sawi.