Tamil Nadu state assembly inthlan neih tur atana an inbuatsaih mek laiin, Pathianni khan DMDK (Desiya Murpokku Dravida Kazhagam) party chu a phel.
Actor aṭanga politician-a inlet ta, Vijayakanth-a party, DMDK aṭanga phelte hian PDMDK (People Desiya Murpokku Dravida Kazhagam) tia invuahin, MLA VC. Chandrakumar-an a ho a ni. Hemi hma hian DMDK hian inthlan neih turah hian Makkal Nala Kootani (MNK)/People Welfare Front (PWF) thawhpuina thuthlung an siam a, mahse hei hi district secretary 10 leh MLA panga-te thutlukna dik lo tak a nih thu an sawi.
DMDK propaganda secretary leh MLA, Chandrakumar chuan MNK nena thawhdunna tur inremna siam dawn hian party office bearer te pawh rawn an ni lo tih a sawi.
Tamil Nadu assembly inthlan hi May 16 hian neih a ni dawn a, May 19 ah inthlan result puan a ni ang.
Assembly seat 234 awmin kum 2011 inthlanah khan AIADMK chuan seat 150 a la a, DMDK-in 29, DMK-in 23, CPM-in 10, CPI in 9 leh party dangten seat 10 an la.
DMK in manifesto tlangzarh
Pathianni khan DMK president M. Karunanidhi chuan inthlan neih tura tana an party manifesto a tlangzarh. DMK headquarters-ah manifesto hi tlangzarh an ni a, inthlanah an party sorkarna siam thei tura thlan tlin an nih chuan zu khap an tiam a, bawnghnute man liter khat Rs 7-a tihhniam an tiam bawk.
Hei bakah hian mipui nawlpuiten man tlawm zawka thil an lei theihna tur Anna canteen siam te, industry lam tihchangtlun te, tuilian venna tur scheme ṭha zawk siam leh, assembly upper house constitution siamte an tiam. Ṭum dang angin Karunanidhi hian mipui nawlpui tana a thlawna thil sem tur a tiam lo. Kum 2006 inthlan dawnah hian DMK hian thlan tlin an nih chuan a thlawna colour television sem a lo tiam tawh a ni.
Karunanidhi chuan zu ngawl veite enkawlna tur rehabilitation centre siam a tiam a, mi rethei zawkte tan buhfai a thlawna kg 20 pek tiamin, education loan ba neite ngaihdam a, medical college awm lohna district tinah din te, journalist-te tan welfare board din te, kum 60 chunglamte a thlawna bus-a chuan tir te, ni 15 chhugna ration card leh smart card pekchhuahte a tiam bawk.
AIADMK-in zu khap tiam
Tamil Nadu-a rorellai, AIADMK pawhin inthlana an chak chuan an state-ah zu khapna dan siam a tiam. Chief Minister leh AIADMK general secretary, Jayalalithaa-i chuan zu khap chu ṭum khatah tih nghal mai theih a ni loh tih sawiin, a tahtawla tih a ngai a ni, a ti . Chennai-a a campaign-naah he thu hi sawiin, CM chuan, " AIADMK in sorkarna a siam leh chuan zu khapna dan chu a tahtawla lekkawh a ni ang. A hmase berah zu awr hawn theih hunte tihtlem sak an ni ang a, bar-te khar ti niin, rehabilitation centre-te siam a ni ang a, zu zawrh phalna pek te pawh tihtlem a ni chho dawn a ni" a ti.
Jaya-i chuan DMK president Karunani-dhi-a chu kum 1971-ah an state-a zu khapna dan hman chu hlipah puhin, ṭhangthar zu chungchang hre lote hnenah zu a kawhhmuh a ni, tiin a sawi. Inrinni khan Jaya-i hian an party candidate tur mi 21 te hming a puang nghal bawk.
