Kerala temple kang vangin mi panga man tawh

Kerala-a Kollam khuaa Puttingal Devi Temple-a kangmei nasa tak chhuak vangin police-te chuan mi panga an man tawh.

Pathianni zing khan temple bula 'Meenaa Bharanani' festival hmanga pungkhawmten halpuah leh halmawi an hal chu halpuah dahkhawmna inah tlain a puak a, kangmei nasa tak a chhuak zui a ni. Kangmei chhuak vanga thi mi 109 an tling tawh a, mi 383 in hliam an tuar. Hliam tuar zinga ṭhenkhat chu an dinhmun a ṭha lo hle.

Kerala Director General of Police (DGP) TP Senkumar chuan halmawi leh halpuah hal buaipuitu zinga mi panga chu man an ni tawh tih a sawi. Halmawi hal intihsiak hi pawl pahnih, Surendran leh Kurishan Kutty kaihhruai pawlten an buatsaih a ni. Revenue leh police official-te chuan halpuah hal phalna pek an ni lo tih an sawi a, Kollam district thuneitute pawhin phalna an pek loh thu an sawi.

Chief Minister Oommen Chandy pawhin vanduaina thlen dan hi Crime Branch bakah High Court Judge hlui kaihhruaia judicial inquiry nei turin thupek a lo tichhuak tawh bawk a ni. Police-te chuan Explosives Substances Act section 4 leh IPC seciton 307 leh 308 hnuaiah thubuai an ziak lut tawh a ni.

Sorkar laipui chuan Chief Controller of explosives safety hnenah temple chhungah hian dan phalloah halpuah leh puak thei thil dang hman a nih leh nih loh enfiah turin a hriattir bawk. Paravur police-te chuan temple thuneitute leh firework contractor chu thubuai an siamsak bawk a, contractor pawh hi a taksa 80% vel a kang a, damdawi-inah enkawl mek a ni.

Kangmei chhuaka thite ralna atan hian Kerala Chief Minister Chandy chuan cheng nuai 10
ṭheuh leh hliam tuar na zualte hnenah cheng nuai hnih ṭheuh pek an nih tur thu a puang tawh a, Prime Minister Narendra Modi pawhin thi chhungte hnenah cheng nuai hnih ṭheuh sorkar laipuiin a pek tur thu a sawi bawk.