NIT zirlaiten exam hun sawn phut

National Institute of Technology (NIT), Srinagar-a buaina thleng vangin state pawn lam aṭanga kal zirlaite chuan minor exam neih tur chu boruak a pangngai leh hma chuan sawn turin an phut.

State pawn lam aṭanga zirlai kalte chuan lungawi lohna hi an lantir a, mahse college official leh HRD ministry chuan an thil phut hi pawm theih a ni lo tih an sawi thung.

Zirlai lungawi lote chuan exam hun hi ni 10 tala sawn hla tura an duh thu sawiin, hemi hunah chuan college buaina pawh a ziaawm theih tawh an beisei thu an sawi.

Zirlaite hian zirtirte pawhin an vau niin an sawi a, "College-ah kan awm chhunzawm zel dawn a nih chuan inthliarna a awm tur a ni lo" an ti. Campus-ah Section 144 puan a nih avangin zirlaite chu nawrh huaihawt khapsak an nih thu an sawi bawk.

Thuneitute hnenan an thil phut hrang hrang an thlen zingah - NIT sawn te, college thuneitute chunga action lak leh zirlaite kut thlaktu Jammu and Kashmir police-te laka action lakte a tel. Heng an thil phutte hi tihhlawhtlin a nih hma chuan class lak chhunzawm lo turin an ngen bawk.