Yemen-a Iran thlawp helpawl, Houthi-in Red Sea-a bungraw phur lawng lian an beih chu Nilaini khan a pil. Lawnga thawktu mi 25 zinga pathum an thi a, mi panga chhanchhuah an ni. Thawktu zinga eng emaw zat chu Houthi hian an man nia sawi a ni.
He lawng hi Eternity C tih niin Liberia flag a inzar. Houthi helte hian Thawhṭanni aṭang khan lawng hi rocket-propelled grenade hmangin an kap a, Thawhlehni thleng khan an beih chhunzawm a ni. Lawng hi ṭum eng emaw zat an kah hnuah chhiain, Nilaini khan a pil ta a ni. Houthi chuan he lawng hi Israel pan tur a nih avanga bei an ni tih an sawi.
Yemen-a US embassy chuan Houthi hian lawnga thawktu eng emaw zat an ru bo nia sawiin, heng mite hi chhuah nghal turin a phut. Philippines chuan lawnga thawktu zinga mi 21 chu an ram mi leh sa tih sawiin, pakhat chu Russia mi a ni a, Houthi beihna avangin hliam na tak a tuar tih a sawi bawk.
Tun ṭum hi Houthi hel beihna avanga kar khat chhunga Red Sea-a lawng lian a pil ṭum hnihna a ni. Pathianni khan helho hian drone leh missile hmangin Liberia flag inzarna tho, Magic Seas chu an kap a, a pil tawh bawk. He lawng hi Palestine lawng chawlh hmuna luh khapna bawhchhetu company ta a nih avanga bei an nih thu an tarlang. Magic Sea lawnga thawktu mi 22 te erawh chhanchhuah vek an ni.
Kum 2023 November aṭang khan Gaza Strip-a Israel-Hamas indona thleng meka Palestinian an thlawpna lantirna tiin, Houthi hian Red Sea leh Gulf of Aden-ah sumdawng lawng lian 70 vel chu an bei tawh. Lawng lian pali chu an kap pil a, lawng panga an man bawk. Lawng an beihte hi Israel bakah, Yemen-a Houthi ho laka beihpui thlaktu UK leh US nena inzawmna neite niin an sawi bawk.
