US-in Gaza-a UN investigator hrekna a ti chhuak

US sorkar chuan West Bank leh Gaza Strip-a UN special rapporteur, Francesca Albanese hrekna chu Nilaini khan a ti chhuak.

Francesca Albanese hi Italian human rights lawyer a ni a, kum 2022 May thla aṭang khan Israel-in Palestinian ram a luaha mihring dikna chanvo palzut a nih dan chhui chiang tura ruat a ni. Gaza Strip-a Israel leh Hamas indona thleng chungchangah Israel chetdan a sawisel nasa a, October 7-a Hamas ten Israel an beih pawh kha Israel in a awpbehna an chhan letna leh, he inbeihna thite pawh Israel vang tih lam hawiin a sawi a, a thusawi hian sawisel pawh a hlawh hle. Gaza-a Israel chetna chu Palestinian mite suatna tiin a sawi. International Criminal Court-in Israel prime minister Benjamin Netanyahu leh official dangte manna tur thupek a tih chhuah thlawptu langsar tak a ni bawk.

US chuan Albanese hi independent investigator a nihna aṭanga sawn turin UN pawh a lo ngen tawh bawk a, mahse UN lamin an sawn duh loh avangin hrekna hi a ti chhuak ta a ni. Hrekna a tih chhuahah, US chuan Albanese chu dan lo leh zah lo taka US leh Israel official-te bakah company leh executive-te bitum tura ICC nawrtu a ni, a ti. Secretary of state Marco Rubio chuan US leh Israel dodal zawnga Albanese-in campaign a kalpui reng chu an enliam mai mai thei tawh lo tih sawiin, 'Kan thawhpuiten an invenhimna tura dikna chanvo an neihna an hmannaah an lamah kan ding zel dawn a ni," a ti.