SKorea President hlui Yoon Suk Yeol an man leh

South Korea president hlui, Yoon Suk Yeol chu nikum December thlaa martial law a puan kaihhnawihah nimin khan a vawi hnihna atan man a ni leh a, thu zawhfiah turin dah hran a ni.

Yoon hian kum 2024, December 3-a an rama sipai hnenah thuneihna sang pekna tur, martial law a puan avangin an ram politics pawhin a buai phah nasa hle a, President a nihna aṭang pawhin paihthlak a nih zui phah bawk. An ram inrelbawl dan laka hela puhna siamsak niin January thla khan man a lo ni tawh a, South Korea president ni lai zinga man tawk hmasa ber a ni. Mahse March thlaah chhuah a ni a, a thubuai erawh ngaihtuah chhunzawm a la ni.

Nilaini khan kum 64 mi, Yoon hi a thubuai ngaituahnaah telin darkar sarih dawn a awh a, an puhna hrang hrangte erawh a hnawl vek thung. Hemi hnu hian detention centre-ah hren a ni a, nimin khan manna tur thupek tih chhuah leh niin dah hran a ni a, ni 20 chhung thleng hren theih a ni ang.

Yoon hian martial law a puan chu North Korea thlawptu leh an ram sorkar dodaltute paih chhuahna tura thil ṭul niin a sawi a, mahse Constitutional Court chuan a chet dan chu democracy bawhchhiatna bakah, ram mipuite phatsanna tiin a sawi ve thung.