Bangladesh-a International Crimes Tribunal (ICT) chuan an ram prime minister hlui, Sheikh Hasina chu nikuma a kaihhruai sorkar laka lungawi lohna lantirte bei let tura police-te thu a pek chungchangah, June 15-ah tribunal hmaa hruai turin Bangladesh thuneitute a hriattir.
Sheikh Hasina hi prime minister aṭanga paihthlak a nih hnuah, nikum August 5 khan India ramah a tlanchhia a ni. Nawrh huaihawtte chungah sorkar thupeka police-te chetdan chungchangah ICT chuan Hasina bakah home minister hlui Asabuzzaman Khan Kamal te manna tur thupek a lo ti chhuak tawh a, Inspector General of Police hlui, Chowdhury Abdullah Al Mamun pawh thubuai siamsak a ni tel bawk.
ICT hi ram war crimes tribunal atana Hasina kaihhruai, Grand Alliance sorkarin kum 2010-a a din niin, a bikin 1971 Liberation War, War of Bangladesh Independence tih bawk hunlaia Pakistan thawhpuia puhte chungthu ngaihtuahna tura tih a ni. Jamaat-e-Islami hruaitu ṭhenkhatte chungthu pawh ngaihtuahin, an zinga Abdul Quader Molla chu dam chhung tang tura hrem a ni a, mahse kum 2013 khan khaihlum a ni.
Judge pathum awmna ICT bench chuan nikuma Hasina leh a kaihhruai sorkar laka lungawi lohna lantirtu, zirlai leh mipui nawlpuite chunga police-te tharum thawhna thleng chu Hasina hian a hriatpui vek tih an sawi. Social media-a video darhah police te chetdan hi home minister hlui Kamal pawhin a enfiah laite a lang bawk.
Sheikh Hasina hi India ramah a la awm reng a, India-in a lo hum avang hian Bangladesh nena an inkar boruak pawh a ṭhat loh phah a ni. ICT-in tribunal hmaa hruai tura a hriattir leh tak avangin Bangladesh sorkar pawhin an rama thawn kir tura India a nawr nat leh phah ngei a rinawm. Kamal hian Bangladesh a chhuahsan bawk a, a awmna tak erawh hriat a ni lo. Al Mamum leh IGP hlui A.K.M. Shahidul Hoque te chu nikum September 4 khan police-ten manin Dhaka-ah an hreng mek a ni.
