Colorado-a Palestinian thlawptu beihnaah mi 8 an hliam

Palestinian firfiak pawl, Hamas-in Israel mi an la hren mekte chhuah phuta Pathiannia Colorado state, US-a pungkhawmte chu Palestinian thlawptu mi pakhatin fire bomb hmanga beiin mi pariat an hliam.

Thuneitute chuan pawikhawihtu hian Boulder khuaa Pearl Street Mall pawn lama awm khawmte a beih dawn hian Palestine zalenna a duh thu a aupui niin an sawi. Hliam tuar mi pariatte hi kum 52-88 inkar an ni.

Federal Bureau of Investigation (FBI) chuan pawikhawihtu nia hriat, kum 45 mi Mohamed Sabry Soliman chu an man tawh tih an sawi. Soliman hi Egypt mi niin, President hlui Joe Biden hun laia US-a non-immigrant visa hmanga lut a ni a, mahse a visa pawh a nung tawh lo niin Homeland Security leh US Immigration and Customs Enforcement lam chuan an sawi.