Gaza Aid Centre-a mi 30 kahhlumnaah Israel leh Hamas inpuh tawn

Gaza Strip-a Rafah khawpuia aid delivery centre-a chhawmdawlna sem dawng tura pungkhawmte chu Pathianni zing khan silai kengten kapin, mi 31 an kap hlum a, hliam 170 chuang an awm. Pungkhawmte kaptuah hian Israel leh Hamas an inpuh tawn.

Gaza-a Hamas kaihhruai sorkara media office chuan mipui pungkhawm, civil mite hi Israel sipaite chuan tank aṭangin an kap tih an sawi. Mahse Israel chuan an sipaiten civil mite an kah loh thu leh, he thil thleng hi an chhuichian tur thu an sawi ve nghal. Hemi hnu hian Israel sipaite chuan drone footage rawn ti chhuakin, civil mite chu Hamas mi leh sate kah a ni tih an rawn sawi ve thung.

Israel Defence Forces (IDF) chuan footage hi X-ah an rawn dah chhuak a, 'Hamas chuan Gaza-a ei tur semte chu an theih dan ang anga lo dan an tum a ni," tiin an ziak bawk. Footage-ah hian hmaituam ṭhenkhatin civil mi, ei tur dawng turte an kap lai a lang a ni.

Gaza Strip-ah hian civil mite chhawmdawlna sem hna hi Israel leh US in a thlawp, Gaza Humanitarion Foundation (GHF) in tualchhunga pawl ṭhenkhat thawhpuiin a sem mek a ni. Hetih lai hian United Nations leh a hnuaia aids group-te chuan GHF kalphung hi a rualkhai tawk lo a, Israel thil tum tih puitlinna kawnga puitu tur nia sawiin an thawhpui duh lo thung.