Poland President atan Karol Nawrocki thlang tling

Poland President thar thlanna neih zawh takah independent candidate, eptu pawl Law and Justice (PiS) party in a thlawp, Karol Nawrocki chu thlan tlin a ni tih nimin khan Polish National Electoral Commission (PKW) chuan a puang.

President thlanna hi May 18, 2025 khan neih a ni a, mahse candidate zingah tling tura vote hmuh ngai zat, vote tla aṭanga 50% hmu pha an awm loh avanign Pathianni, June 1 khan inthlan thawh hnihna hi vote hmu sang pahnihna ten an hmachhawn a ni. Vote thlak thawh hnihnaah hian Karol Nawrocki leh rorellai Civic Coalition (KO) party candidate, Warsaw mayor Rafal Trzaskowski te an inhmachhawn a ni. Vote tlate chhiar kim a nih hnuah, kum 42 mi Nawrocki hian 50.89 % hmuin Poland President thar a ni dawn ta a ni. Trzaskowsk hian 49.11% a hmu ve bawk.

Poland President thar tur, Karol Nawrocki hi historian, Institute of National Remembrance hotu nilai a ni. Catholic sakhaw zuitu niin, chhungkaw dah pawimawh tak a ni a, European Union chhungah Poland-in a ram china thuneihna sang tak a neih duhtu a ni bawk. August 6-a a term tawp tur, President Andrzej Duda a thlak dawn a ni.