US-a Columbia University chuan president Donald Trump kaihhruai sorkarin federal funding, USD mtd 400 a tih tawp sak hnuah campus chhunga hmaituamna, face mask khap a remti.
Gaza Strip-a Israel-Hamas indona a thlen hnuah Columbia University hi Palestinian-te thlawpna lantira nawrh huaihawt nasatna hmun leh, Juda mite enhran leh huatna thlenna a ni. US sorkar chuan Juda-te huatna thleng ṭhin dan kawngah University hi a hlawhchham nia sawiin, sorkarin fund a pek pawh a tih tawp sak a ni.
President Trump kaihhruai sorkarin University hnenah fund, USD 400 ngaihtuah ṭha leh tura thil phut pakua a neihte a hriattir hnuah, Zirtawpni liam ta khan University chuan a thil phutte hi an pawm thu sawiin, heng zingah hian campus chhunga hmel thupna atana face mask hman khapna pawh a tel. Hei bakah nawrh huaihawtnaa telte nihna zawh a nih pawhin hriattir zel a remti bawk. Middle Eastern, South Asian and African studies department hotupawh thlak a ni ang.
Columbia University-in an thil phutte zawm a remtih thu sawi tawh mah se, sorkar chuan fund hi a pe leh nghal dawn em tih erawh a la sawichiang lo thung.
Sorkarin fund tih tawp a nih thu a puan hnuah, University chuan nikuma Palestinian thlawptuten nawrh an huaihawt leh, campus building a luah ṭuma inhnamhnawih zirlaite chu thunun an ni dawn tih a puang. Zirlai ṭhenkhat chu hnawtchhuah niin, ṭhenkhat chu suspend an ni bawk.
Columbia University bakah university dang 60 vel chu an campus-a Juda huatna lantirna thleng nia sawite an dan loh chuan an fund tih tawp sakah sorkar chuan a vau bawk a ni.
Tun thla tir lam khan federal immigration thuneitute chuan Columbia University zirlai, Mahmoud Khalil chu an man a ni. Khalil hi dan ang taka US-a awm ni mah se ,nikuma campus-a nawrh huaihawtnaa a inhnamhnawih vangin an rama thawn kir tura tih a ni.
