Israel Supreme Court-in Shin Bet hotu banna a dan sak

Israel prime minister Benjamin Netanyahu rawtna anga Israel cabinet-in intelligence agency, Shin Bet hotu Ronen Bar an banna chu Israel Supreme Court chuan a dan sak.

Kar liam ta Ningani zan kha cabinet meeting chuan Hamas-ten 2023 October 7-a Israel an beih chungchangah, Shin Bet hotu hi a hna leh mawhphurhnaa hlawhchhamah puhin a hna aṭanga ban hi an remti a ni. Mahse Zirtawpni khan Supreme Court chuan cabinet thutlukna siam hi lo dan sakin, April 8 hma ngeia Bar chungchanga hearing neih a nih hma chu ban a nihna hi dan a ni.

Ronen Bar hi kum 2021 October thla khan Shin Bet hotu atan hian ruat niin, kum nga term a ni. Kum khat chuang hun a la nei a ni. Israel sorkarin a banna hi a kaltlangpui a nih chuan an ram chanchina Shin Bet hotu ni lai ban hmasak ber a ni ang.

Bar ban tum a nih avang leh, Gaza Strip-a indona chhunzawm a nih leh duh lohna lantirin eptu pawl kaihhruaiin mi tam takin lungawi lohna an lo lantir ve bawk.