UNICEF-in hmeichhe naupangte lehkha zir phalsak turin Taliban ngen

United Nations (UN) children's agency, UNICEF chuan Afghanistan-a roreltu, Taliban chu hmeichhe naupangte lehkha zir a khapsak chu ti tawp a, school session tharah chuan school kal phalsak tawh turin Inrinni khan a ngen.

Afghanistan-ah hian Class VI chunglam chuan session thar an ṭan tawh a, mahse hmeichhe naupangte erawh kal tir an la ni ve lo. He khapna avang hian hmeichhe naupang nuai li ve chu lehkha zir tur a dikna chanvo an neihte rahbeh sak an ni tiin agency chuan a sawi. Secondary leh higher education-te huamin he khapna hian hmeichhe zirlai nuai 2.2 vel a nghawng a ni.

Taliban chuan hmeichhia-te school kal an khapna chhan chu Islamic law, Sharia nena a inmil loh vang tih an sawi. Hmeichhe lehkha zir duhte chu school-ah kal loin, online class an nei ṭhin.