Turkey-ah nawrh huaihawt zinga mi 340 man

Turkey sorkarin Instanbul mayor, Ekrem Imamoglu a man avangin nawrh huaihawt chhunzawm zel a ni a, nawrh huaihawtnaa tel mi 340 chuang man an ni tawh.

Mayor Ekrem Imamoglu man a nih avanga lungawi lohna an ram khawpui, Ankara bakah Istanbul leh khawthlang lam khawpui Izmir bakah khawpui lian dangah te lantir chhunzawm a ni. Nawrh huaihawtte leh riot police-te chu an innawr buai nasa hle. Riot police-te hian mipui hnawh darh nan pepper spray, tear gas, rubber bullet leh watter cannon te an hmang a ni.

Imamoglu hi Turkey president Recep Tayyip Erdogan khingpui lian ber niin, President khing thla thei tura ngaih a ni. Eptu pawl, Republican People's Party (CHP)in 2028 President thlanna neih tura an party presidential candidate atana puan an tum laiin, kar liam ta Nilaini khan firfiak pawl thlawp leh puia puhin man a ni. Hei bakah hian eiruk, inbumna kalpui leh a mimal hlawkna atana dan loa data lakhawmah puh a ni bawk. Eirua puhna kaihhnawihah hian Zirtawpni khan police-te chuan darkar ruk chhung thu an zawtfiah a, mahse Imamoglu hian an puhna chu a pha vek thung.

Imamoglu ukil, Mehmet Pehlivan chuan an puhna leh hren beh a nihna chhan chu an ram mipuia a lar chho leh tla na zel tur tih chhiat an tumna a ni tiin, dik lo taka puh a ni, a ti. Imamoglu pawh hian a ukil kaltlangin X-ah thuchhhuah a siam a, ram chhung hmun hrang hranga dik lo taka man a nih avanga lungawi lohna lantirtute chu a chhuan thu sawiin, Turkey ram leh democracy humhimna tura beitute an ni, a ti.