South Korea mipui tam tak chu Pathianni khan khaw vawt tak hnuaia Seoul-ah pungkhawmin, president a nihna aṭanga chawlh lailawk tir mek, Yoon Suk Yeol chu ban a nih bakah man an phut.

Martial law a puan avanga President a nihna aṭanga ban tura an phut, Yoon Suk Yeol manna tur thupek hi tih chhuah a lo ni tawh a, anti-corruption agency leh police-te chuan man tumin a chenna pawh an pan a, mahse president security service ten lo dang a, darkar nga vel zet an inep hnuah man an tumna hi an ti tawp leh ta rih a ni. Warrant hi nimin thleng khan la nung mah se Yoon man tum hian hma an la zui lo. Presidential security staff-te hian President chenan in luhna gate leh, kartawp lama Yoon chenna in, tlanga awm panna kawngte chu thirhlingnei hmangin an hung a ni.

Yoon chungchang chhuitu, Corruption Investigation Office for High-Ranking Officials chuan presidential security service-in an ven chhung chu Yoon man chu a theih dawn loh niin an sawi. Hei vang hian acting leader, deputy prime minister Choi Sang-mok chu service hnenah hian agency thupek chu zawm tura hriattir turin an ngen a, mahse Choi hian thuchhuah engmah a la siam lo.

Yoon man tumna an lo dan avanga sawiselna tam tak a awm avangin presidential security service hotu, Park Jong-on chuan chhangin, President ni lai venhim an tih tur a nih thu a sawi. Security service hian sawisel an hlawh nasa hle a, Yoon-a private army ti tein an tawng a ni. Park chuan an member-te pawh Yoon man tuma kal, investigator-te lakah pawh tharum hmang lo tura a chah thu a sawi a, anti-corruption agency leh police-te chu kawng dang dap turina ngen bawk.

Hetih lai hian National Assembly-a eptu pawl lian ber, Democratic Party hruaitu Park Chan-dae chuan anti-corruption agency chu a rang thei ang bera Yoon man turin a phut thung a, agency-ten hun an khawhral zel chuan a ti lawm lo hle tih a sawi.