US-ah thli tleh vangin state 6-ah emergency puang

US-ah Pathianni khan vur thli nasa taka tlehin, khaw vawt pawh a zual phah hle. Khaw chin zirtuten vur nasa takin a la tlak chhunzawm dawn niin an sawi a, hei vang hian Kentucky, Virginia, West Virginia, Kansas, Arkansas leh Missouri state chuan state of emergency an puang a, Florida pawhin warning a ti chhuak bawk.

National Weather Service chuan Kansas leh Missouri-ah chuan vur sur chu inches 8 vela chhah a tling thei dawn niin a sawi a, thli tleh chak lam hi darkar khata mel 45-a na te a tling bawk. Kansas, Nebraska khawthlang lam leh Indiana hmun ṭhenkhata kawngpuite chu vur a tlak nasat avangin motor eng emaw zat an tangkhang a, National Guard-ten tangkhangte hi an pui a ni. Weather Service chuan kum 10 chhunga vur a tlak nasat ber a thleng maithei niin an sawi.

Indiana state police-te pawhin vur tlak nasat avang leh, a la tlak chhunzawm dawn avangin mipuite chu zin chhuak lo turin an ngen. Kawngpuia vur tlate chu thenfai a nih pawhin darkar chanve hnu lekah vurin a khuh leh nghal vek zel a ni. Vur tla nasa hian Midwest region-a rel service pawh a ti bahlah a, FlightAware pawhin flight 200 vel an cancel tawh bawk.