January 10-ah Trump hremna ti chhuak dawn

US-a Manhattan judge Juan M. Merchan chuan hush money case-a thiam loh chantir, US president-elect Donald Trump hremna tur chu January 10 hian tih chhuah a ni dawn tih a sawi.

Donald Trump hi January 20 hian US President atan lak luh a ni dawn a, hetih lai hian Manhattan judge hian lak luh a nih hma ngeia a hremna tur tih chhuah hi a tum a ni. President atana thlan tlin a nih hnua Trump-a'n he case ti tawp tura a ngenna pawh Judge Merchan hian a lo hnawlsak tawh a, January 10 hian court-a inlan tura tiin, a thei lo a nih pawhin virtual tala inlan turin a ti.

Trump hian 2016-a US President thlanna neih dawna porn star Stormy Daniels-in an inkawp tawh tiaa sawi chungchangah, a ka hupna atan sum tam tak peah puhin, a sum pek thupna atan hian business record dik lo tak a siam niin an puh. Hei vang hian thiam loh chantir a ni. Mahse Trump chuan Daniels thusawi hi thu dik lo a nih thu a sawi thung. Hremna hi pawisa chawi tir aṭanga kum li thleng lungin tantir theih a ni a, mahse Trump hi jail tantir emaw, sum chawi tir emaw a nih a rinawm lo thung. Mahse thiam loh chantir a nihna record erawh a awm reng dawn thung. Trump team chuan federal court lama khin let emaw, a nih loh pawhin US Supreme Court inrawlh tura an ngen mai theih thu an sawi.

Republican thupuangtu, Steven Cheung chuan New York judge-in Trump hremna siam a tum lui hi presidential immunity palzutna a nih thu a sawi. He case kalpui zel chu dan lo a ni tiin, an ram constitution pawhin ti tawp turin a phut niin a sawi. Hetianga dik lo taka titute chu President Trump hian a bei let zel dawn a ni, a ti.