Hamas-in an mi hren 34 chhuah an inhuam thu sawi

Palestinian firfiak pawl, Hamas chuan Israel nena inkahhai puanga inremna an siam theih chuan, he inremna hnuaia tang inthlengna turah a thawh khatna atan Israel mi an hren mek zinga mi 34 chhuah an inpeih thu Pathianni khan an sawi.

Hetih lai hian Israel prime minister Benjamin Netanyahu chuan Hamas hian tang an chhuah tur list hi an la pe lo tih a sawi thung.

Hamas official chuan a thawh khatna atana tang an chhuah turte hi hmeichhia, naupang, kum upa zawk leh damlo te an ni tih a sawi a, hengte hian an la dam em tih leh an dinhmun te hrechiang tura anmahni hrengtute an zawh phawt a ngai a, hemi atan hian kar khat vel hun an duh dawn niin a tarlang.

Qatar, Egypt leh US hmalakna hnuaiah Israel leh Hamas hian inkahhai puang tura inbiakna an la nei chhunzawm mek a, mahse inremna hi an la siam thei lo. Tun kar tawp lamah Qatar-ah inbiakna hi an chhunzawm beisei a ni.