South Korea Parliament member-te chuan an ram president Yoon Suk Yeol chu sipai hnena thuneihna sang pekna tur, martial law a puan chungchangah President a nihna aṭang paihthlak rawtna chu an pawm ta.
Eptu member-te hian a hmain President Yoon paihthlak rawtna, impeachment motion hi an ram parliament, National Assembly-ah an pu lut tawh a, mahse rorellai People Power Party (PPP) lamin an boycott avangin vote laknaah a tlang zo lo. Mahse a vawi hnihna atana impeachment motion an put luh hi PPP member ṭhenkhatin an lo thlawp tak avangin a tlang ta a ni. President paihthlak rawtna hi Parliament-ah tlang mah se, constitutional court in a la ngaihtuah ve leh a ngai dawn a ni.
Inrinni liam ta, December 14, 2024-a vote laknaah PPP member 12 in motion an thlawp avangin, eptute hian motion tlang tura Parliament member hmun thuma ṭhena hmun hnih vote an mamawh chu an hmu thei ta a, President paihthlak duh lam ah vote 204 a tla a ni. Constitutional court hian ni 180 chhungin Yoon paihthlakna hi pawm a ni dawn nge, a office-a a luah chhunzawm a remti dawn tih thutlukna a siam a ngai ang.
Constitution Court-in Presient paihthlakna hi a pawm a nih chuan, thutlukna a siam aṭanga ni 60 chhungin President thar hi thlan a ngai dawn a ni. Yoon paithlak hi a remti a nih chuan, Yoon hi South Korea chanchina President paithlak pahnihna a ni ang. Kum 2016 khan President hlui, Park Guen-hye paihtlak rawtna chu pawm niin, March 2027-ah President a nihna ṭang hian paithlak a lo ni tawh a ni.
National Assembly- impeachment motion a tlang tak avangin, Yoon hi President mawhphurhna aṭangin chawlh tir rih a ni a, prime minister Han Duck-soo chu acting president in a awm nghal a ni. PM Han chuan President hna a hmui chhungin inrelbawlna ngelnghet tak a awm theihna turin theihtawp a chhuah dawn tih a sawi.
Yoon hian martial law a puan chungchangah an ram mipuite hnena ngaihdam dil tawh mah se, mipuiten bang turin an nawr chhunzawm reng a ni. Gllup Korea-in kar liam ta Zirtawpnia an ram mipuite ngaihdan a lakah pawh Yoon duhtu hi a tlahniam tawh hle a, 11% chauhin President atana an duh thu hi an sawi. President paithlakna duhtu hi 75% an tling bawk.
