Syria sorkar paihthlatu,Hayat Tahrir al-Sham (HTS) helpawl chuan president paihthlak tak, Bashar al-Assad a hunlaia an rama tan-in siamte chu khar an tum tih an sawi.

Helpawl hruaitu, Ahmed al-Sharma chuan sorkar hmasa hnuaia security force chu ṭhiah vek a tum tih a sawi. Sharma hi Abu Mohammed al-Jolani tia hriat lar a ni. Helpawl hian Assad kaihhruai sorkar an paihthlak hnuah in nghaisakna nasa tak thlenna hmun nia sawi, Saydanaya tan-ina hren mi sang tel chu an chhuah tawh bawk.

Assad kaihhruai hnuaiah hian tan-in hrang hrangah mi 60,000 vel chu nghaisak leh tih hlum an ni tih UK-a hmunpui nei, monitoring group Syrian Observatory for Human Rights chuan a tarlang a ni. Jolani chuan mi tang nghaisakna thleng ṭhina inhnamhnawihte chu an umzui zel dawn tih sawiin, ram danga tlanchhiate pawh an tlanchhiatna ram hnenah Syria-a thawn kir tura an ngen tur thu a sawi.

Bashar al-Assad sorkar paihthlak a nih hnuah, mi tam tak chuan an chhungte, chin hriat loha hun rei tak awm tawhte chanchin ngaihvenin tan-in hrang hrang an pan nghal a ni. Kum 2022-a Turkey-based Association of Detainees and The Missing in Saydnaya Prison (ADMSP) report chuan kum 2011-a Syria tualchhung indona a chhuah aṭangin, Saydnaya tan-in chu in tihhlumna hmun, death camp-ah a chang tawh niin a lo sawi tawh a ni.

HTS in an ram prime minister lailawk, caretaker prime minister atana a ruat, Mohammed al-Bashir chuan sakhaw hrang hrangte dikna chanvo venhim sak a tiam a, inbeihna thleng vanga ram danga tlanchhiate pawh an in lama kir turina sawm nghal bawk.

Caretaker PM chuan, "Islam sakhaw zuitu kan nih angin Syria rama mi zawng zawng, eng pawl mi pawh an dikna chanvo venhim sak vek an ni ang," a ti. Hemi rual hian sorkar thar hnuaia an ram danpui siam tur chu Islam sakhaw behchhana siam a nih dawn leh dawn loh chungchang chu an la sawifiah tur thu a sawi bawk.