America mipui 20% chauhin Biden-a fapa ngaihdamna thlawp

US president kalchhuak tur, Joe Biden-a'n a presidential power hmanga a fapa, Hunter Biden thiam loh chantir a nihna aṭanga a ngaihdam chu America mipui 20% chauhin an thlawp.

President Biden hian a chhungte an nih avangin thiam loh chantir an nihnaa a ngaidam dawn lo tih a hmain lo sawi tawh mah se, a term tawp dawn hnaiah a fapa Hunter Biden hi a ngaidam leh ta tho a ni. Hei hian sawizui pawh a hlawh hle a, a bikin Republican lam aṭanga sawiselna pawh a tawk nasa hle a ni.

The Associated Press-NORC Center for Public Affairs Research in mipuite ngaihdan a laknaah, American mipui 20% chauhin President Biden thutlukna siam hi an thlawp. Democrats lamah 40% in President thutlukna siam hi thlawpin, 30% in an thlawp lo. Hetih lai hian Republican lamah chuan a tam berin an thlawp lo a, independent lamah 50% in an thlawp lo bawk.