Europe-a hruaitu thil tithei berah Italy PM thlang

Political digital newspaper company, Politico-in ranking thar a tih chhuahah, Italy prime minister Giorgia Meloni chu Europe khawmuala ram hruaitu thil tithei leh huhang ngah berah a thlang.

Kum 2022-a Italy Prime Minister a nih aṭangin, right wing Brothers of Italy party hruaitu, Giorgia Meloni hian a kaihhruai sorkar hnuaiah migration leh LGBTQ+ kaihhnawihah dan khauh tak siamin a kengkawh nghal a ni.Pem lut chungchanga khuahkhirhna khauh tak a siam chuan sawisel tawk mah se, Europe ram hruaituten an thlawp ṭha hle thung.

Italian Social Movement activist aṭangin Italy rama hmeichhe prime minister ni thei hmasa ber, Giorgia Meloni kaihhruai sorkar hi tam tak chuan a din rei theih an ring lo. Mahse a kaihhruaina hnuaiah hian hun rei tak hnuah Italy rama sorkar ngelnghet ber a rawn din thei a ni. An ram leiba neih hi an GDP aṭanga 137% a la ni chungin, an ram economy pawh ramdang investor-te hip lut thei hkhawpin a sawh nghet chho mek bawk.