Hamas firfiak pawl chuan Thawhṭanni khan video tichhuakin, hetah hian Israel mi an hren mek zinga mi pahnih chu Israel sipaite beihpui thlaknaah an thi niin an sawi.
Palestinian firfiak pawl video tihchhuahah hian an hren mek zinga mi, university zirlai, Noa Argamani-i (26) chuan Hamas hoin an sawitir angin, a tanpui pahnihte chu an thi a, 'IDF beihpui thlaknaah an thi a ni,' tiin a rawn sawi a, amah chu Hamas fighter-te chuan an rawn chhanchhuak niin a sawi bawk. He video hi engtik huna siam nge a nih tih erawh hriat chian a ni lo. Hamas-in Israel sipaite beihna avanga thi nia an sawite hi Yossi Sharabi (53) leh Itai Sivrsky (38) te an ni a, an pahnih dam lai video hi Pathianni khan an lo tilang tawh a ni.
Israel sipai thupuangtu Rear Admiral Daniel Hagari chuan Hamas-te puhna chu phain dawt sawiah a puh. An mi hrente chu Israel sipaite beihna avanga thi an ni lo tih chiang taka a sawi theih thu a sawi. 'Itai hi kan sipaite'n an kap hlek lo. Hei hi Hamas-ho dawt sawi mai a ni. An hrenna building hi sipaite'n an target zingah pawh a tel lo a, kan sipaite hian an bei tel lo a ni," a ti. Hamas mi hrente awmna nia an hriat hmunte chu an bei tel ngai lo tih a sawi. Hamas-ho chu an chan a chauh tawh avangin Israel mipuite leh an mi hren chhungte rilru tibuai zawnga chein ṭan an la niin a puh bawk.
South Gaza lama indona hautak zual a zo hnai : Defence Minister
Israel defence minister Yoav Gallant chuan Gaza Strip chhim lama indona hautak zual chu a zo hnai tawh niin a sawi. Army lam pawhin division an dah pawh an la chhuak niin an sawi.
Hun eng emaw chen chu Israel sipaite hian Gaza chhim lama Khan Yunis leh Rafah khawpuiahte ngawrh taka beihpui thlakin, Hamas-ho hmun tam tak an kah chhiatsak tawh a ni.
Israel army pawhin an website-ah Gaza ram laili leh hmar lama Hamas-ho hmun tam tak an tihchhiat a, an tunnel-te an tihchhiat hnuah an sipaite lak chhuah an ni tawh tih a sawi. Gaza chhim lamah pawh an hlawhtling chho ve thuai dawn niin an tarlang. Israel hian Gaza-a beihpui thlaknaah hian division pali a hmang a ni. Mahse sipai a lak chhuahte hi eng zat chiah nge tih erawh a sawi chiang lo.
