Iran-in Nobel laureate Mohammadi jail tan hun pawtsei

Iran Revolutionary Court chuan Nobel Peace Prize winner, Nagers Mohammadi a hremna chu thla 15-in a pawhseisak.

Mohammadi hi thubuai hrang hrangah thiam loh chantirin, kum 12 zet a tang tawh a ni. Tan in chhung aṭang pawh hian Islam Republic dodal zawnga thil ti-ah puh a la ni zui bawk.

Court-in a hremna a pawhseisak hi Mohammadi chhungte hian sawiselin, kum 2021 March thla hnua hremna pek a nih ṭum ngana a ni tawh tih an sawi. Narges Mohammadi hian Iran rama mihring dikna chanvo humhalhna tura beiin kum tam tak chhung hma a lo la tawh a, a thiltih avang hian jail-ah pawh a tang fo a ni. Ṭum 13 zet man ni tawhin, thubuai hrang hrangah thiam loh chantirin, kum 31 tang tura hrem a lo ni tawh a ni. Court-in a tan hun chhung a pawhseisak rual hian, a tan hun a tlak hnuah pawh kum hnih chhung chu ram pawna a zin chhuah khap a nih bakah, hemi hun chhung vek hian mobile phone a neih phalsak a ni dawn lo a, social leh political group member a nih khapsak a ni bawk.

Thuneitute lam aṭanga dodalna nasa tak a tawk chungin, kum 51 mi human rights activist Mohammadi hian theihtawpin hna a thawk zel tho a, Iran rama hmeichhe rahbehna dodal a, a hnathawhte avangin 2023 Nobel Peace Prize hlan a ni. Nikum October thla khan a fate chuan Oslo City Hall-ah chawimawina hi an dawnsak a ni.