Ramaswamy-a'n President candidate a chuhna titawp; Donald Trump a thlawp tur thu a sawi

US President thlanna neih tura Republican party presidential candidate nih tuma chuhtu zinga mi, biotech entrepreneur Vivek Ramaswamy chuan candidate nih tuma a chuhna a titawp tih Thawhṭanni khan a sawi a, president hlui Donald Trump chu a thlawp dawn tih a sawi zui bawk.

Ramaswamy hian Iowa caucuses-ah palina a nih hnuah Presidential candidate nih a tumna hi a tawpsan tih a sawi a, Republican presidential candidate nih tuma an inumnaah a tan hmabak a awm dawn lo niin a sawi.

Republican presidential candidate tur thlanna neihna hmasa ber, Iowa caucuses-ah hian president hlui, Donald Trump chu a chak ber a, White evanglical leh conservative voter lamin an thlawp ṭha hle. Iowa hian delegate 40 neiin, kum 2016 aiin Iowa-ah Trump hi a che ṭha zawk a ni.

Kum 38 mi, Ramaswamy chuan Iowa-a hnehna a chan avangin Trump hi lawmpuina pawh a hlan a, President thlanna neih tura an kal zelnaah pawh a thlawp chhunzawm zel dawn tih a sawi. Ramaswamy hian an campaign lai pawhin a khingpuite chu na takin bei ṭhin mah se, Trump erawh a fak ṭhin hle a, kum zabi 21-naa president ṭha ber tiin a sawi a ni. Iowa-ah hian Florida Governor Ron DeSantis chu pahnihna niin, UN ambassador hlui Nikki Haley chu pathumna a ni.