Britain-in firfiak pawlah Hizb ut-Tahrir a puang dawn

Britain chuan Hizb ut-Tahriri chu Juda hawtu leh dodaltu a ni tiin, firfiak pawlah puan a tum.

Parliament chuan terrorism law hnuaia firfiak pawla Hizb ut-Tahriri puan a rawtna hi tun kar chhung hian an sawiho dawn tih Home Office chuan a tarlang.

Home secretary James Cleverly chuan, 'Hizb ut-Tahrir hi Juda dodaltu pawl niin, firfiaka chetna chawi lartu a ni a, October 7-a pawikhawihna rapthlak tak thleng pawh fakin, an lawm zawk a ni," a ti. An pawl website-a Hamas-te'n October 7-a Israel chhim lam an beihna lawmna an neih te, Hamas member-te pasalṭha anga an chhuahte chuan firfiaka chetna an thlawp leh chawilarzia a lantir a ni, a ti. Hemi hma pawhin he pawl hian Juda mite beihna chu an lo lawmin, a beitute pawh an lo fak ṭhin niin a sawi bawk.

Britain prime minister hlui Tony Blair leh David Cameron-te pawh khan thuneihna an chan lai khan Hizb ut-Tahrir hi dan pawna hnawl an nihna turin hma an lo la tawh a, mahse, an ruahmannate erawh an kalpui chhunzawm leh ta lo a ni.

Hizb ut-Tahrir hi kum 1953-a din niin, an headquarters hi Lebanon-ah a awm a, ram 32 velah an inzarhpharh a ni. Britain bakah US, Canada leh Australia-ah pawh awmin, Islamic Law hmanna tur ram din chu an tum ber a ni tiin Home Office chuan a tarlang. Ram eng emaw zatah dan pawnah hnawl a ni tawh a, heng zingah hian Bangladesh, Egypt leh Germany te pawh an tel.