France satirical magazine, Charlie Hebdo-in Iran supreme leader, Ayatollah Ali Khamenei cartoon a tihchhuah vangin Iran a lungawi lo hle a, France a vau zui nghal.
Kartin chhuak chanchinbu hian Iran tualchhung buaina thleng mekah, sorkar laka lungawilohna lantirte thlawpna lantirin nikum December thla khan Iran-a sakhua leh political leader-te cartoon competition a siam. Hemi hnu hian Iran hruaitute tihelna lam cartoon hi eng emaw zat a tichhuak tawh a ni.
Iran foreign minister Hossein Amir-Abdollahian chuan, France ram chanchinbuin an hruaitute hmusit leh deuna lam cartoon a tihchhuah chu an ngawihsan mai dawn lo tih a sawi. "France sorkar hi a huang chin a pelh kan remti lo," a ti. Mahse eng angin nge an chhan zui dawn tih erawh a sawilang lo.
Iran rama France ambassador, Nicolas Roche pawh foreign ministry chuan Nilaini khan an ko a, an lungawi loh thu pawh an hrilh tawh bawk.
Foreign ministry thupuangtu Nasser Kanani chuan, "Freedom of expression tih behchhana hmangin France hian Muslim ramte hmusit leh zahawmna tibawrhbang zawng a thil ti tur hian dikna a nei lo," a ti.
Cartoon tihchhuah chungchangah France sorkar insawifiahna chu an nghak reng tih a sawi.
