Pope hlui Benedict XVI vuiliam a ni ta

Pope hlui, Benedict XVI chu nimin khan Vatican City-a St Peter's Square-ah vui a ni.

Benedict XVI vuina mass hi Pope Francis-a'n a kaihruai a,vuina inkhawmah hian mi 60,000 chuang an tel. Benedict hi St Peter's Basilica-ah pope hluite phumna hmunah phum a ni.

Benedict XVI hi kum 2013 khan a kum upat leh hriselna ṭhat tawk loh avangin pope a nihna aṭangin a bang a, kum 600 chhunga pope bang hmasa ber a ni.

Pope ṭanglai a nih loh vangin, an vui dawn hian St. Peter’s Basilica dar pawh vuak rik a ni lo a, phum a nih hnua pope thite sunna atana ni kua sunna hun hman ṭhin pawh hman a ni dawn lo bawk.